Categories
Lyrics

Aap ki naaten main likh likh kar sunaun aap ko lyrics

Aap ki naaten main likh likh kar sunaun aap ko lyrics

Aap ki naaten main likh likh kar sunaun aap ko
Kis tarah razi karun kaise manaun aap ko

Aap ko razi na kar paya to mar jaaunga main
Chhoti Chhoti kirchiya’n ban kar bikhar jaaunga main

Zindagi ka is tarah mujhko maza kya ayega
Dil siyahi ke bhawar me doobta rah jayega

Wasta doon aapko main aap ke Hasnain ka
Yaar ghar-e-sour ka Siddiqa-e-konain ka

Aap to dushman ke haq me bhi dua karte rahe
Bewafa logon se bhi har dam wafa karte rahe

Aap to rahmat hi rahmat hain jahanon ke liye
Mere jaise be-amal or be-thikano ke liye

Aap ka hai roothna arz-o-sama ka roothna
Arsh ka sare jahano ke khuda ka roothna

Aap ki naaten main likh likh kar sunaun aapko
Kis tarah razi karun kaise manaaun aap ko

Aap ki nazron se jo girta hai mar jata hai wo
Raakh ban kar apne qadmon me bikhar jata hai wo

Is tarah to aadmi khud aadmi rahta nahi
sahib-e-iman kya insan bhi rahta nahi

Kaise kaise dushmano par raham khaya aap ne
Aag se kitne hi logo ko bachaya aap ne

Apne jooton apne saye me bitha lijiye mujhe
Aap ka nacheez khadim hun dua dijiye mujhe

Zindagi ki tez lehron me na bah jaun kahin
Gird ban kar raste hi me na rah jaun kahin

Aap ko khatoon-e-jannat or Ali(r.a) ka wasta
Aap ko Farooq, usman ghani (r.a) ka wasta

Aap ki naatan main likh likh kar sunaaun aapko
Kis tarah razi karun kaise manaaun aap ko

Zindagi ko ek bahut mushkil safar darpesh hai
Ek mushkil imtehan baar-e-digar darpesh hai

Soch me dooba hua hoon, soch hi me qaid hoon
Bebasi ghere hue hai, bebasi me qaid hoon

Toot te jaate hain sare aasre jitne bhi hain
Be asar hain log sab chhote bare jitne bhi hain

Kis qadar kitna zaroori hai sahara aapka
Meri qismat hi badal dega ishara aap ka

Log aksar shayer-e-ashab kahte hain mujhe
Unki khatir roz shab betaab kahte hain mujhe

Be amal hoon maghfirat ka ek sahara hai zaroor
Aap ka har ek sahaabi jaan se pyara hai zaroor

Aap ki naaten main likh likh kar sunaaun aapko
Kis tarah razi karun kaise manaaun aap ko

Maine mukhtas kar li apni chashm-e-tar unke liye
Muztarib rahta hun hamesha sham-o-sahar unke liye

Main na sarmad hun na majnu hu na main mansoor hun
Unka shayar or unka banda-e-mazdoor hoon

Meri khwahish hai ke unki khoobiyan likhta rahun
Shouq se mai aasmaan ko aasmaan likhta rahun

Unki khatir aap mujh par meharbani kijiye
Mere hal-e-zaar par aaqa tawajjo dijiye

Aap se rishta ghulami ka sada qayam rahe
khuwajgi aur bandagi ki ye fiza qayam rahe

Mere sar par mushkilon ka aasmaan girne ko hai
Zarra-e-nacheez per koh-e-gira girne ko hai

Aap ki naaten mai likh likh kar sunaun aap ko
Kis tarah razi karun kaise manaun aap ko

Ghup andhere me khara hoon ae hira ke aftab
Purza purza ho rahi hai meri khushiyon kitab

Mere haq me apne khaliq se dua farmaiye
Ae mere aaqa karam ki inteha farmaiye

Dekhte hain to mujhe be-aasra kahte hain log
Ahde mazi ki koi bhooli sada kahte hain log

Kis tarah rokoon mai is toofan aur sailaab ko
Zehen se kaise nikaloon khoufnak is khwab ko

Meri apni saans bhi ab to mere bas me nahin
Thak gai hai chalte chalte ab meri loh-e-jabeen

Dekh kar dushwar raahen zindagi ghabra gayi
Mere ghar tak aate aate roshni ghabra gayi

Sabz-e-gumbad ki taraf uthti hain nazren baar baar
Aap ki rahmat ko deta hai sada ye khaksaar

Khaliq-e-arzo-samaan se ab dua kijiye huzoor
Meharban ho jaye mujh aasi pe ab rabb-e-ghafoor

Meri himmat se zyada hai preshaani ka bojh
Main utha sakta nahin apne tan-e-faani ko bojh

Rah pe chalte hue ab dagmaga jata hun main
saans lene pr bhi ab to larkhara jata hun main

Lab hila dijiye meri khatir dua ke waste
Raham farma dijiye mujh par khuda ke waste

Aap ki naaten mai likh likh kar sunaun aap ko
Kis tarah razi karun kaise manaun aap ko

Read it: Sarta ba qadam hai tane sultane zaman phool Naat Lyrics

Read it: Noor Khaliq Ke Noor Se Maango Naat lyrics